Tuesday, April 24, 2007

ما تخلي حدا يضحك عليك، انت نجحت بجدارتك


هاي هي الجملة الأكثر شهرة في إدارة السير، اذا كنت قدمت الامتحان العملي للحصول على رخصة سواقة في الأردن خلال ال 3 سنوات الماضية، احتمال كبير تكون سمعتها من الشرطي اللي امتحنك.
أنا لمّا قدّمت الامتحان للمرّة التالتة سمعتها من الشرطي، ومع إني ما كنت سقت (قدت السيارة) كويّس (من كَوَسَ يكوس فهو كُوَيِّس) وبالعكس كانت أسوأ مرّة من المرات الثلاث.
والله أنا أخدت هالجملة مبسوط، وحكيت إنو الشرطي أكيد عارف مواهبي اللي ما قدرت أظهرها في فترة ال 3 دقائق اللي امتحنت فيهم، وما حكيت لحدا شو صار.
قبل أكمن (والله غير تضلك ساعة تحاول تفهم شو هاي الكلمة) يوم، صديقي يزن نجح في امتحان العملي بطريقة غريبة، اللي بهمّنا في الموضوع إنو انحكتلو نفس الجملة "ما تخلي حدا يضحك عليك، انت نجحت بجدارتك" لمّا حكالي القصة، اضطريت أعترفلو إني أنا انحكتلي نفس الجملة، فاعترفلي إنو أخوه اعترفلو إنو انحكتلو نفس الجملة...
الغريب بالموضوع مش مين اعترف لمين ولا أكمن اعتراف صار، بس الغريب إنو الفترة الزمنية اللي سمعنا فيها الجملة كانت سنين!!! وكمان المكان اللي قدّمت فيه الامتحان يبعد عن المكان اللي قدّم فيه هو (يزن) امتحان أكتر من 20 كيلومتر!!!

النتيجة اللي توصّلنالها إنو النجاح والرسوب في امتحان قيادة السيارات شغلة مزاجيّة وما بتعتمد على أي إشي تاني (حتى الشرطي في بعض الاحيان ما بعرف ليش نجّحك أو رسّبك) وسبب شهرة هاي الجملة إنو مسؤول اجتمع في موظفين ادارة السير وبهدلهم لأنو الامور مزاجيّة وسايبة عندهم، واختتم البهدلة بإنو اذا كان و لا بدّ، لمّا تنجحو حدا اقنعوه إنو نجح بجدارتو مشان ما يطلّعو علينا سُمعة مش كويسة واحكولو: "ما تخلي حدا يضحك عليك، انت نجحت بجدارتك"، الجماعة حفظو الجملة حرفيّا وصارو يحكوها للكل.

يا سيدي، أنا فارقة معي.... المهم إني نجحت بجدارتي

4 comments:

Anonymous said...

بدك الصراحة؟ انا ما حد حكالي اياها .. مع اني نجحت من اوّل مرة! غريبة
تعرف اعتقد الفكرة انهم يعطوك شوية ثقة بالنفس.. مش اكثر.. و كمان من المعروف ان ساحة التدريب الحقيقية هية الشوارع.. بدون رقيب.. فمتوقع انك رح تتعلم اكتر بعد ما تاخد الرخصة و تمارس القيادة في الشوارع

و يا سيدي .. الف مبروك الرخصة و عقبال العروس واللي رح تاخدها برضو بجداتك.. ما تخلّي حد يضحك عليك

7aki Fadi said...

قبل أكمن (والله غير تضلك ساعة تحاول تفهم شو هاي الكلمة)

LOL

I love your Arabic posts man they are HILAROIUS...the words you come up with are just classic!

Keep it up :) and mabrook ilrokhsa

Anonymous said...

َqwaider: الله يبارك فيك، مع إني أخدتها زمان، وبالنسبة للعروس أكيد رح آخدها بجدارتي... و بجيب ولاد برضو بجدارتي :)

7aki: ما بعرف كيف، بس أنا الموضوع مرّات بفرض عليّ اللغة... جدّ في بوستات ما بعرف أكتبها بالعربي، وفي بوستات ما بعرف أكتبها بالانجليزي
والله يبارك فيكي

Anonymous said...

والله بدك الصراحة انا انحكتلي الجله بس بصيغه اخرى
انت نجحت بجدارتك مش عشان الواسطه اللي معك