عينك عينك

الزمان: صباح يوم الخميس 4/10/2007
المكان: أمام منزل الراوي
الشخوص: والد الراوي، امرأة غريبة
الاحداث:
تطرق المرأة الغريبة باب منزل الراوي، ثم يخرج والد الراوي بعد عدّة طرقات ويدور الحوار التالي:
- مرحبا...
-- أهلين!!!
- أنا من لجنة مؤازرة لأحد المرشحين للإنتخابات النيابية
-- أهلا وسهلا
- كم شخص بصحّلّو ينتخب عندكو؟
-- خمسة
- بنعطيكو خمسين دينار اذا بتنتخبو مرشحنا...
-- !!!
- بتحب نسجّلكو معنا؟
-- بس انتو مع أي مرشّح؟
- إذا كنتو مسجّلين في الدائرة التانية انتخبو فلان الفلاني، أما إذا كنتو في الدائرة الرابعة انتخبو علّان العلّاني...
-- !!! لا والله ما النا مصلحة (والكلام هنا ليس حرفي، لأن الراوي كان قد نسي النص الأصلي)
- ليش انتو مع مين؟
-- مش مع حدا

مرشّحين ولا إلهم دخل

توجه عدد غير مسبوق من المواطنين الاردنيين البارحة للمشاركة في الانتخاب لعضوية المجالس البلدية في المملكة، حيث سجّل للتصويت ما يقارب مليوني ناخب وناخبة.
بغض النظر إذا كان في تلاعب أو تزوير أو ما كان في، بدّي أحكي عن موضوع تاني.

أنا (وأعوذ بالله من كلمة أنا) كنت من هالمواطنين اللي سجلو، بس ما صوتت لأي حدا، وللأسف بحكي إني ما صوتت.
عدد المرشحين لم يكن بالقليل ولكن لم يكن لأحد منهم برنامج انتخابي واضح (إذا كان إلو برنامج أصلا)، كيف ممكن أصوت لشخص لا أعرف إلا اسمه، و إنو ناوي يعمل إشي كويّس (كما هو مكتوب على يافطة في أحد الشوارع)؟؟؟

كيف انتخب المواطنين؟؟؟
أغلب المواطنين صوتو لمرشحين لمجرّد إنهم بعرفو ناس من المؤآزرين إلو في حملتهم الانتخابية أو لأنهم من عائلتهم .
لحد الآن، أي شخص صوّت بسألو: "ليش صوّتت إلو بالذات؟"، والجواب دائما: "لأني بعرف فلان اللي في حملتو الانتخابية، أو لأنو ساكن في منطقتنا أو لأنو من أقاربنا" وبالأغلب ما بعرفو عنّو إشي تاني.

ما حدا منهم فكّر إني لازم أعرف شو ناوي المرشّح يعمل إذا نجح؟؟ وعلى فكرة إذا بدّو يعرف مش رح يقدر... لأنو حضرات المرشّحين (في منطقتي على الأقل) من خلال اليافطات والمنشورات ما حكو إلا:
1. الاسم وشوية من السيرة الذاتية.
2. شعارات لا تدلّ على خطط المرشّح.

بدّي أحكي شوي عن الشعارات:
الشعارات في اليافطات كانت من هذا القبيل:
"منطقة النصر الأوفر حظا، انتخبو فلان الفلاني"
"التقوى، الجرأة، الاخلاص... مرشحكم فلان العلّاني"
"الأردن أولا، هدف واستراتيجية"
"لأن صوتك أمانة، صوّت للأفضل، الدكتور المهندس الصيدلي أبو محمد"

و الكثير من العبارات التي ليس لها مقصد مفهوم، رح أحاول أنشر صور عن الموضوع لاحقا.
أما النشرات فأحد المرشحين كاتب إنو من أهدافو "وقف نزف الدم في العراق وفلسطين" !!!؟؟؟
شو دخل عضو في مجلس بلدي في هيك موضوع؟؟؟

بشكل عام أغلب المرشحين ما كان عندهم هدف واضح غير إنهم يوصلو للمجلس.
و بما إنو نسبة التصويت عالية، فهذا يدلّ على أحد أمرين:
إما إنو الناس بتصوّت لناس ما بتعرف عنهم إشي.
أو إنو أنا مش عايش بهالبلد

انتخابات... وانتخابات

حكومتنا الرشيدة عاملة حملة لتشجيع المواطن الأردني على المشاركة في الانتخابات البلدية،" أنا شخصيا أول مرّة بسمع في الانتخابات البلدية!" الحملة واسعة جدا، على التلفزيون الأردني "إذا في حدا بتابعو" وفي الجرايد وحتّى وصلتني مسج على موبايلي...

للوهلة الأولى الواحد بحكي: "هاي الحكومة ناوية هالمرّة عنجد تنمينا سياسيا!!!" بس وين شطح فكرك يا حبيبي، وقّف عندك، شوف الجامعات، اللي فيها شباب الوطن -الجيل الصاعد، بتلاقي إدارة الجامعة الهاشمية مانعة الحرية، وبتلاقي الجامعة الاردنية مانعة الديمقراطية.

الجامعة الاردنية، ديمقراطيتها غير شكل، إشي سوبر ديلوكس، إشي من الآخر يعني...
حسب قانون الجامعة يعيّن نصف مجلس الطلبة من قبل الجامعة!!! ورئيس المجلس كمان، يعني الطلاب مستحيل يتخذو أي قرار.
لأ وإسمو مجلس طلبة لازم تسمّو مجلس جامعة، في رد من عميد شؤون الطلبة بحكي إنو:
"النظام جاء بعد دراسة مستفيضة تم خلالها تحديد الإيجابيات والسلبيات للنظام. وأضاف أن دراسة أعدت في العام 2000 اظهرت أن الانتخابات الطلابية أحد الأسباب الرئيسة للعنف في الجامعات نتيجة عدم تمثيل كافة الأطياف في الجامعة"

أولا، النظام مطبّق من 7 سنوات، والعنف زاد لأنو أغلبو ما إلو علاقة بالانتخابات الطلابية.
ثانيا، طيب ما دام الطلاب هم اللي بنتخبو، كيف ما بكون ممثّل للأطياف؟؟؟ وبدكو 50% تعينوهم مشان تمثلو الأطياف؟؟؟ 49% ما بزبط؟؟؟
أطياف مين، إنتو بدكو 50% مشان ما يطلع أي قرار إلا بموافقتكو.

والله في شويّة حرّية

يصادف اليوم يوم "حرية الصحافة العالمي"، ثلاث كلمات إذا ذكرتها أمام أحد أفراد الشعب الأردني الكريم فإنك في الأغلب سوف تلاحظ ردّ الفعل الآتي:
"هاهاها، قال حرية قال، أي أصلا الت..."
(سكوت مفاجيء وتغير شديد في نبرة الصوت): " آه... الحمد لله، احنا بخير... والله غيرنا ما عندهم حرّية...، وانت من أهلو... وتعالو زورونا..."
ثم صمت مطبق وسؤال بنبرة أمل: "صحيح، شو أخبار عباس ابن أخت عمّة خالة أبو حماتك" (عاد عبّاس توفّى من سنتين)
ثم يتمتم هذا المواطن: "انشالله يكون نسي التخبيص اللي تنيّلت وحكيتو!!!"
هذا الموقف سوف يحصل معك، خصوصا إذا كان المواطن المسؤول (اسم مفعول من سأل، وليست لها علاقة بالمسؤولية) لا يعرفك من فترة طويلة.

------- فاصل ليس له علاقة بالنص -------

بتعرف إنو أول مرّة بخطر في بالي إنو كلمة مسؤول (بمعنى: موظف كبير) مشتقّة من مسؤولية!!! غريب،،، مع إنو ما إلهم دخل ببعض

------- عدنا -------

اللي بدّي أحكيه، بغضّ النظر عن ارتفاع سقف الحريّات عندنا في الأردن، فأغلب المواطنين ما بسترجو يوصلو لإبريز الكهربا.
بعض أفراد الشعب هون جبناء جدأ، و معلوماتهم على قصص قديمة وأحيانا خرافية؛ الأغلب ما بسترجي يحكي عن الحكومة إنها غلطانة (هي الحكومة بتغلط) وأنا هنا لا أتحدّث عن الحوارات اللي بتصير بين الأصدقاء أو الأقارب اللي بعرفو بعض من 20 سنة على الأقل.

مثلا، هاي الفئة بتخاف تنضمّ لأحزاب سياسية، و تشارك بمسيرات (حتى لو كانت مرخّصة) و بتخاف تكتب بالصحف ووو
وإذا صار واحد يحكي معهم عن موضوع سياسي بدون خوف وصار ينتقد الحكومة، بحكو: "هاظا موخابرات، بدّو يشدّ اجرنا ويخلّينا نحكي..."

يا شعب، قوم إصحا، الأحزاب سمحو فيها... والحكومة انتقدوها... وفي شويّة حرية استغلّوها

الجامعة الهاشمية تمنع أسبوع الحجاب

«الهاشمية» تمنع أسبوعا للحجاب.. و«الأردنية» توافق على إقامة حفل موسيقي «روك»

السبيل - علاء عوا

«أيتها اللؤلؤة المصونة.. صوني نفسك»، «أنت كاللؤلؤة فاحفظي نفسك بالحجاب»، لافتات كتبت عليها هذه الشعارات وغيرها، كانت معلقة على الجدران داخل حرم الجامعة الهاشمية، من أجل إقامة «أسبوع الحجاب» والذي نظمته طالبات لـ (9006) طالبات داخل الجامعة، ولتكريم حوالي 100 طالبة لارتدائهن الحجاب. لكن الشعارات لم تدم طويلا، إذ أقبل رجال الأمن الجامعي واقتلعوها اقتلاعا، ولم يسمحوا بها، على حد وصف إحدى الطالبات.

أما على الجدران داخل حرم الجامعة الأردنية فإعلانات تقول: « كلية الفنون تدعوكم لحضور حفل موسيقي (الروك).. وذلك يوم الثلاثاء 17/4/2007، في تمام الساعة الواحدة ظهراً.. في مبنى الكلية».

وإعلانات لحفلات أخرى تقول: «حفلة الربيع.. الخميس 19 نيسان.. الساعة الرابعة مساءً»، «أغاني عربية، مقطوعات موسيقية، أغاني انجليزية»، لكن هذه الإعلانات لم يؤمر الأمن الجامعي بإزالتها! والعمادة وافقت على إقامة هذه الحفلة.

الخبر كاملا

بما إني كنت طلب في الجامعة الهاشمية وبعرف كتير شباب في الاتجاه الاسلامي، بعرف شو المشاكل اللي بواجهوها مع عمادة الجامعة.

الجامعة بتخاف من سلطة الاتجاه الاسلامي، لأنو الاتجاه الاسلامي إلو شعبية كبيرة بالجامعة بين الطلاب. وأكبر دليل كان نتائج انتخابات مجلس الطلبة. الجامعة ما بدّها يوصل عدد كبير من الاتجاه الاسلامي للمجلس وما بدّها عدد المواليين "إن صحّ التعبير" يزيد، لأنها بدّها تمشّي قراراتها بدون اعتراضات و وجعة راس، فبتحاول تخوف الطلاب من الاتجاه بشتّى الطرق؛ استجواب أفراد الاتجاه أحيانا بدون أسباب، اعطاء الانذارات لأسباب واهية، ... إلخ

وأكيد الحدّ من نشاطات الاتجاه رح يدعم توجه الجامعة.

والحكومة بتفخر إنو عندنا وزارة تنمية سياسية، وبتدعو الشباب للمشاركة بالأحزاب وبالحياة السياسية!!! إذا كانت أولى تجارب الشباب في الحياة السياسية زي هيك، شو بتتوقّع الحكومة منهم.

تنمية سياسية مين والناس نايمين....

مقاعد النواب محدّدة من الآن!!؟

البارحة وأنا أتمشّى مع اثنان من أصدقائي في جوّ مغبرّ كليا...
"شو؟؟؟ مش زابطة معي الفصحى"
جرى الحوار التالي:
س1: شو هالجو القرف.
س2: طيّب مدام الجو غبرة وقرف، ليش طالعين وبنتمشّى؟؟؟
هنا ظهرت علامة سؤال فوق رؤوسنا.....
أنا: على الأقل أحسن من التسوية عند س1، كلها عفن ودخان...
س2 (مغيّرا الموضوع): الانتخابات قرّبت
س1: لسّا لشهر 7
أنا (محاولا كشف ميولهم السياسية): في حدا ببالكو ناويين تنتخبو
س1: يا زلمة، عالفاضي المقاعد محددة لمين من هسّا
أنا: قصدك كل أكمن عشيرة متفقين يرشحو واحد منهم؟؟؟
س1: لأ، هاي شغلة تانية
أنا: كيف محددين يعني
س2: يعني النواب رح يضلّو نفسهم!!!
أنا: طيب، من الآخر، مين بدّك تنتخب؟؟؟؟
س1: مممممممممم
س2: أنا اللي بعطيني 10 ليرات بنتخبو
أنا: تيسلرهل هعييلب هلهييفلبب اسنتريامشبهعمشسي
س2 (محاولا تغيير الموضوع مرّة أخرى): اسمعو هالنكتة....
وحكالنا نكتة سياسية، لا أفضل ذكرها هنا

فزعتكو

النواب، المفروض يصونو الحريّة مش يحدّوها!!!!
شو هي فزعتكو؟؟؟

تحديث

تم الغاء عقوبة الحبس من قبل مجلس الأعيان وأقرّه مجلس النواب.
الخبر

A man I like

These are some photos of the the Palestinian prime minister "Ismaeel Haneyeh" in his visit to Iran.






As a part of Iran's protocol he is to pray with them, but as you see he is not because of doctrinal differences between sonna and shea'a.



I don't think that this is rudeness, but the man is loyal to his principles.

Before about two months this photo was taken, here you can see chairmen of some Jordanian and Israeli municipalities having fun after signing a collaboration agreement.

دينار سنويا على كل خط خلوي

ضمن آخر عروض الحكومة الاردنية أعلنت وزارة المالية عن إضافة رسوم لدعم الجامعات على كل خط خلوي بقيمة دينار اردني فقط لا غير بس، وذلك اعتبارا من 1/3/2007.
اذا كنت من مشتركي باست ثينك ادخل 1234 ثم اضغط زر الاتصال، اختر 0 ثم اسمع سمّة البدن.
من المرجّح انه قد تم خصم المبلغ منك عزيزي المواظب على الدفع
انتهى الخبر

------------------ فاصل اعلاني ------------------

المرسل: مواطن
المرسل إليه: الحكومة
التاريخ: من زمن جار علينا

عزيزتي الحكومة، ليش؟
عزيزتي الحكومة، وين؟

ليش كل هاي الضرائب والرسوم؟؟؟ اللي ضايل رسوم الهوا ورسوم تساقط الامطار ورسوم الكرتون....
وين بتروح كل هاي المصاري؟؟؟؟ خصوصا مصاري الجامعات....
ما احنا شايفين الجامعات قديش بتوخد رسوم . وغير المساعدات والرسوم اللي بندفعها (غير رسوم الهاتف الخلوي)
وكمان شايفين شو بتعملش نشاطات للطلاب

وفي النهاية، اهدي اغنية والله ما يسوى لحكومتنا الرشيدة


والسلام