Thursday, February 14, 2008

زيادة أجور النقل مرّة أخرى - بضم الهمزة

قامت هيئة تنظيم قطاع النقل بتعديل اجور النقل مرة تانية لبعض الخطوط.
على فكرة، نفسي أسمع من أي جهة رسمية إنو تم رفع أي إشي، فالمسمى الرسمي لرفع الاسعار هو "تعديل الاسعار" .
اول اشي فكّرت إنو الحكومة عندها حساسية من هالكلمة، أو ما بتحكيها لنفس السبب اللي ستّي بتسمّي السرطان "هظاك المرظ" ، بس لمّا تم تعديل رواتب الموظفين أعلنو رفع الرواتب أو زيادة الرواتب مش تعديلها.

على العموم مش هون المشكلة، هيئة تنظيم قطاع النقل لمّا رفعت أو عدّلت اجور النقل قامت بالرفع بشكل مدروس (زي ما سمعت من مسؤولي الهيئة أكثر من 20 مرّة) يراعي انو يضلّ في هامش معقول من الربح للسائقين، وبكلّ مرّة كانو يدعو السائقين إنو يتقدّمو بشكوى اذا كان عندهم اعتراض.
لهون ما في مشكلة لأنو ما حدا ما بغلط (لل ما استخدامات كتيرة على فكرة).
المشكلة في التالي: بعض السائقين اعترضو وفعلا تم الموافقة على رفع الاجور مرّة تانية، بس الزيادة التانية كانت في بعض الحالات اكتر من الاولى!!!!
مثلا باصات الزرقاء-معان قبل الزيادة كانت 185 قرش، تم زيادتها لـ 225 ثم في المرة الاخيرة لـ 280 قرش.
رغدان- السلط 30 قرش ثم 37 وبعدين 45 قرش.
ما بعرف غير هاي الخطوط لأنو في موقع هيئة تنظيم قطاع النقل مش موجودة الاسعار الجديدة !!
أنا ما عندي اعتراض على زيادة الاجور لأنو الديزل والبنزين ارتفع على السواقين، لكن هل فعلا دراسات الهيئة كان فيها هامش خطأ أكبر من 100% ؟؟ لأنوالزيادة التانية اكبر من الاولى.
وقدّيش الباص أبو الخمسين راكب بصرف من الزرقاء لمعان مشان يوخد اجار مجموعو 140 دينار؟؟؟
هل الهيئة متعمدة رفع الاجور بالتدريج مشان ما يعترض حدا؟؟؟
هل تعمّدو رفع الاجور أول مرّة يوم صدور نتائج التوجيهي؟؟؟
هل انا قاعد بخبّص؟؟؟

2 comments:

nasimjo© said...

وااااااااااااااااال! 45 قرش خط رغدان السلط!! هذا هو الغباء ... في المرة الثانية المستثمر حط السعر على كيفه!

Hamza said...

weeeeeeeeeeeeenak ya abu 7maid
ya rajol eshtaqna la 7akyatak el 7elweeeen
ya3ni 3alayeh el 6arboooosh ennak 6aqa3etna
looking forward to hear back from you ;)
Meeeeeezooooooo