Monday, June 25, 2007

عالسيارة يا بندورة


وأنا صغير (يعني حوالي 9-10 سنين) كانت سيارة خضرا (خضار) تمر من عند بيتنا وينادي على الخضار اللي عندو، وبما إني مسؤول الشوبنج في تلك الأيام :) كنت أطلع أشتري من عندو بندورة أو كوسا أو أو أو...
طبعا كل نسوان الحارة يكونو موجودين، مش مشان يشترو بس، فبالنسبة إلهم كان هذا الموعد مناسبة إجتماعية. يعني اللي بدها تشتري وإللي ما بدها بتطلع.

وهيك بكون في عندو أزمة، وأنا بما إني كنت ولد صغير، في أغلب الأحيان كنت آخر واحد بشتري، لأنو أبو رامي (الخضرجي) لازم يمشّي (يوزنلها ويحاسبها) إم محمد لأنها بتزعل، وإذا بدّو يمشّي إم محمد لازم يمشي إم علي لأنو إم علي ما بتحب تنترك مع نسوان الحارة لحالها، وإم تيسير نقّاقّة، وإم...

في تلك الأيام كانو الولاد نوعين :
1. نوع ما بحب ينترك بدون ما يعمل إشي.

2. باقي الأولاد الصغار.

وأنا كنت من النوع الأول، مشان هيك في يوم من الأيام خطر ببالي إني أوزّن البندورات اللي بدي أشتريهم مشان أروّح، والله وزنت هالبندورات وعجبتني هالشغلة وبما إنو أبو رامي كان يحبّ يرغي (يكنكن) مع النسوان، صرت أوزّن لهالنسوان. أنا كان الميزان بالنسبة الي إشي غريب وكنت مبسوط عالشغلة هاي.

المهم يا طويل العمر والسلامة، صارت هاي عادة يومية عندي حتّى لمّا ما أكون بدي أشتري إشي وضلّيت على هالعادة أيام.
في يوم من الأيام سألتني إم عباس: "انت ليش بتغلّب حالك و بتوزّن عن أبو رامي؟"
أنا دهشت لهالسؤال!!!

على سيرة الدهشة خد هالنكتة: في واحد كان كل يوم يصحى مندهش، في يوم من الأيام صحي مش مندهش... فاندهش

عودة لموضوعنا، بعد ما اندهشت تصوّرت إنو لو جاوبتها "أنا بحب أعمل هيك" مش رح تقتنع بالجواب، فجاوبتها بعقليّة عصبيّة قبليّة :) "لأنو محسيري..."
إم عباس: "بس أبو رامي مش محسيري!!!"
أنا: "@$#^%&%##"

وطير يا طير، والله يمسيكو بالخير

7 comments:

M Kilany said...

ta7sheesh ya man...
Great post... and this is the weirdest hobby I've ever heard of weighing vegetables... Abu Rami must have loved you...

Anonymous said...

I really hope you got over your hobby! LOL!

Anonymous said...

M Kilany: yea, Abu Rami have tried to adopt me :D
No, really he was happy with my hoppy, who wouldn't :)

Who-sane: I got over it zamaaaan, bs wallahe enno meezan el kaftean mosalli :)

7aki Fadi said...

LOL Ahmad.
Man i really love your arabic sotries :).
SO SO SO did you start the new job yet? do you like it?

Anonymous said...

7aki: I'm so glad that you liked it.
and about the new job:
first, its so nice from you to ask (thanx alot).
second, I'll start the new job beginning from next Sunday.
I think I'm gona blog something about that.

Opairah said...

أحمد ليش انت كنت صغير بيوم من الأيام؟
يعني عمرك بحياتك كان عمرك 9-10 سنين
لاء ما بتوقع
وبالنسبة للي سأل اذا بلشت شغلك الجديد فأكيد قصدو شغلك الجديد خطابة لأنك ما شاء الله عندك خبرة وبتعرف كل نسوان الحارة ومتربي على ايدين أكبر كنكنجي اللي هو أبو رامي الخضرجي

"أنا كان الميزان بالنسبة الي إشي غريب وكنت مبسوط عالشغلة هاي"
يا أخي اللي بيقرأ هادا الشي بيحكي يا الله عالبراءة شكلك عايش طفولة بريئة

وصحيح ليش انت ما كنت تروح عالمدرسة حتى كنت انت اللي تنزل تعمل شوبنج؟

Anonymous said...

opairah:
لووووووووووووووووووووووول
اسكت ... بكفي فضايح ولا :)