الله يجيرنا شرّ هالظحك

الزمان: دارت أحداث هذه القصة قبل ما يقارب الشهر.
المكان: في سرفيس ضاحية الحسين، متجها من دوار الحرمين (اشارة الكيلو سابقا) إلى وسط مدينة عمان.
الشخوص:
1. شفير سرفيس يبدو في التسعينات من عمره.
2. شاب مصري الجنسية.
3. رجل في نهاية الاربعينيات يظهر أنه موظف أمن خاص.
4. شاب ظهر فيما بعد أنه عاطل عن العمل.
5. محدثكم الكريم.

والله يا جماعة الخير، وأنا بستنّا بباص المؤسسة، أجا هالسرفيس بدّو يحمّل ركاب،... أنا بطلع بالباص لأنو بوصّلني للمجمع و من هناك بطلع بباص تاني للبيت، والسرفيس ما بوصل المجمع، بس بما إني ما بحب الروتين وبسبب سلبيات باص المؤسسة، حكيت لحالي: "يا ولد، امسك حالك واطلع بالسرفيس"، والله وهاضا اللي صار.
بعد ما مشينا أبو كيلو (تقريبا كيلومتر) بلّش الشفير يحكيلنا عن قصّة صارت معو.
القصة كانت بتضحّك وخصوصا الأسلوب اللي كان يروي فيه.
المهم، يا سيدي العزيز، طول ما الشفير بحكي بالقصّة واحنا فارطين ضحك، وحتّى بعد ما خلّص القصة تبادلنا الحديث ضاحكين منشكحين...
وأنا صرت أفكر: والله السرفيس أحسن من الباص، العدد بكون قليل وبنحي وبنتعرّف وبنضحك.
لسّاتني بفكّر بهالموضوع، واللي جنبي بحكو مع بعض و بضحكو، وإلا الشفير صار يتنحنح و "إحم ححححححححم...." والكل سكت، وتابع الشفير بلهجة جديّة جدا -زي أبصرمين بفلم أبصر إيش- : "الله يجيرنا شرّ هالظحك!!!"
طبعا بعد هيك الكل انسم بدنو وانخرس.

أنا بعمري ما سمعت إنو الضحك ممكن يسبب مصايب، شو هالعقليّة اللي عنّا هون؟؟؟؟

بس على كلّ، مالها باصات المؤسسة والله أحسن من أحسن سرفيس.... وبعدين أنا بدّيش أتعرّف على حدا